Gjinushi: Nano dhe Rama janë njësoj, nuk futemi në një koalicion PS- LSI

Intervistoi: Fejzi Braushi

 

Kryetari i socialdemokratëve  Skënder Gjinushi, teksa analizon gjendjen në kampin e majtë, paralajmëron largimin nga koalicioni me PS dhe krijimin e një koalicioni tjetër me PDS-në dhe PSV91. Ai shprehet se partia e presidentit Topi s’ka vend në koalicionin e majtë dhe lëvizja e Fatos Nanos duhet të provohet se i shërben së majtës.

Zoti Gjinushi, mazhoranca ka paraqitur në Kuvend një draft për kufizimin dhe heqjen e imunitetit në disa raste. Ndërkohë, nga ana e PS-së ka pasur një dakordësi në parim, por duke vendosur një sërë kushtesh. Si do e konsideronit një nismë të tillë?

Kjo është një nismë tendencioze dhe alibi qeveritare e radhës, që provokon opozitën dhe opinionin publik e faktorin ndërkombëtar dhe si gjithnjë kemi dhe një ndjenjë kompleksi të PS-së, e cila çuditërisht ende ndien nevojën të justifikohet që Saliu nuk do luftojë korrupsionin dhe nuk qenka PS për të penguar Saliun për të luftuar korrupsionin. Kur të tërë e dinë që me apo pa imunitet, kjo qeveri di vetëm të vjedhë. Për të qenë më konkret, këtu abuzohet rëndë me idenë se gjoja kjo qenka pjesë e rekomandimeve. BE nuk kërkon thjesht heqje imunitetesh, por kërkon luftë kundër korrupsionit, rritje të pavarësisë së gjyqësorit, ndëshkim të të korruptuarve veçanërisht në nivelet e larta. Pra, nuk kërkon marrjen e një mase të veçuar, por të një pakete të tërë dhe veçanërisht veprime konkrete dhe vullnet politik pozitiv. Heqja e imunitetit në kushtet kur qeveria vetëm prodhon dhe mbron korrupsionin dhe s’ka as vullnetin dhe angazhimin minimal për të ndëshkuar apo ndryshuar gjendjen, shërben vetëm si alibi për qeverinë për të fshehur këtë implikim skandaloz të saj. Heqja vetëm e imuniteteve pa u paraprirë a shoqëruar kjo masë me veprime të tjera, është po aq e gabuar saç ishte dhe është heqja dorë nga 12 rekomandimet e BE-së, fatkeqësisht edhe prej opozitës, për t’u kufizuar vetëm në dy reforma të pjesshme në letër, zgjedhore dhe parlamentare. Kufizimi dhe jo heqja, pra as që duhet bërë fjalë për heqjen, duhej të shoqërohej me rritjen e pavarësisë së institucioneve, Presidenti, prokurori, SHISH, gjykata dhe vetë rolit të Kuvendit, duke kthyer votën e fshehtë. Një gabim i tillë do të ishte më i rëndë si gabim se ndryshimi i Kushtetutës në vitin 2008. Në këtë mënyrë do konkludohej se gabimet e 2008 s’kanë qenë as për llogari të gabuara dhe as të rastit, por janë faje që i kushtojnë shqiptarëve që janë të detyruar të durojnë për 8 vjet një qeveri që s’e kanë votuar, për shkak të paaftësisë dhe kapjes dhe të opozitës.

PD dhe PS arritën të mbyllin të gjitha çështjet e reformës zgjedhore, të paktën ato që kishin listuar vetë…

Komisioni i Reformës Zgjedhore ka arritur të mbyllë me turp një nga farsat më të shëmtuara që është bërë për opinionin publik shqiptar. Përfundimisht, Shqipëria është kthyer në një vend eksperimental, tashmë të ligjëruar dhe të bekuar nga vetë misioni i OSBE-së në Shqipëri dhe ca miq të Sali Berishës. E them këtë qartazi, sepse absolutisht BE ka kërkuar në letër dhe institucionalisht që shqiptarëve t’u garantohen standardet zgjedhore dhe nuk po i qëndron kësaj. Garantimi i standardeve zgjedhore nuk është reforma në letër dhe kur ajo në letër është e hajrit. Pas disa dështimeve radhazi, absolutisht doli qartë që një nga zgjidhjet është ajo që kanë aplikuar shumë vende të botës së tretë për të evituar manipulimet dhe që është futja e teknologjisë. Dhe kjo teknologji iu premtua shqiptarëve dhe është detyrim, ju premtua që para zgjedhjeve të Majit, ku vetë disa ambasadorë thanë se tani nuk ka kohë. Nuk e di se ku e gjetën mungesën e kohës për të ndaluar vjedhjen, por thanë se kjo do bëhet për zgjedhjet e ardhshme. Të njëjtën gjë tha BE pas vjedhjes spektakolare të Tiranës. Kjo rezultoi reforma pa asnjë efekt, e bërë në tëra kohërat. Çfarë u ndryshua, ose çfarë premtohet ndryshe në letër që do jetë ndryshe më 2013? Asgjë. Themi asgjë, sepse ndryshimet kryesore do të ishin balancimi i tërë administrimit të zgjedhjeve. Nuk është realizuar.

Nuk e garanton balancim formula e gjetur prej PD-së PS për kompozimin e KQZ?

Absolutisht nuk e garanton. Të gjithë e dinë që në momentin që zgjedhja bëhet në Kuvend, me procedura s’ka rëndësi sesi, nuk mund të ketë i shtati i KQZ-së fat më të mirë se Presidenti i Republikës.

Gjithsesi kjo formulë është pranuar nga PS…

Është shumë i qartë prononcimi ynë që PS nuk duhet të merrte përsipër një reformë me Sali Berishën, kur ai nuk e pyet, dhe kur ai vendos gjithçka vetë. Prandaj, e para është balancimi; e dyta është kontrolli i kartave dhe i votës. Nuk u fut, nuk u pranua. Dhe këtu reforma ra, në mënyrë më absolute, sepse ti nuk ofron asgjë të re për zgjedhjet e ardhshme. E treta është sistemi që të mos kemi më Dushk. Është modeli i keq, sepse nuk ka sisteme të këqija. Dhe modelet janë me deformime. Kur del makina me defekt, nuk do të thotë se është Benzi i keq, por të ka qëlluar ty. Dhe kjo nuk u bë. Pra atëherë çfarë u realizua? A e kuptoni sesa qesharake u bë kjo reformë?

U pranua vetëm ajo që ishte pranuar më 2009, pra kontrolli me dy anëtarë të KQZ-së ishte pranuar në letër dhe s’u pranua në praktikë. Ndërsa tani Saliu s’e pranon as në letër. Unë them hap kutinë të marr faktin, ai thotë më sill faktin që të hap kutinë. Po të kem fakt s’kam pse ta hap kutinë. Ndaj kjo reformë ka dështuar ashtu siç ka dështuar reforma parlamentare.

Është dështim i të dyja palëve?

Dështimi është i qeverisë si vullnet negativ. Vullneti negativ i qartë dhe ne na vjen keq që na vërtetohet çfarë kemi thënë. Nuk mund të bëhet reformë për të mos vjedhur qeveria. Nuk mund të bësh reformë me hajdutin, sesi mos të vjedhë hajduti. Dua të shtroj një pyetje, çfarë e pengon futjen e kontrollit të kartave?

OSBE dhe ODIHR kanë sugjeruar…

Cila OSBE? Futja graduale e votimit elektronik është tjetër gjë. Sepse votimi elektronik do kulturë, do një shkallë të caktuar zhvillimi. Ndaj është krejt normale që votimin elektronik duhet futur fillimisht në zonat urbane, ku njerëzit janë mësuar me teknologjinë. Kurse kontrolli i kartave nuk është i votuesve, nuk do kulturë votuesi, sepse e bën shërbimi. Siç e bën ai me bojë, që të lyen gishtin dhe pastaj të fut gishtin. Çfarë pilotimi thonë këta? Këto janë gjëra që janë provuar në gjithë dynjanë. Por pyetja është kush i trembet kësaj? Në një takim që kemi patur, OSBE-së i kam thënë “se reforma me amendime në Kod dihet shumë mirë që nuk japin efekt. Amendimet në kod japin po atë efekt që jep në uljen e aksidenteve amendimi i Kodit Rrugor. Pra, është vetëm premisë. Po nuk fute teknologjinë, sepse është gjë esenciale dhe kjo është e reja, nuk ka efekt”. Kjo nuk pranohet dhe thuhet se edhe këtë radhë t’i bëjmë zgjedhjet si më parë.

Zoti Gjinushi, partitë e vogla patën një kërkesë për të korrektuar sistemin zgjedhor pa ndryshuar Kushtetutën. Çka mbetet një nga kërkesat e patrajtuara. Do kushtëzojë kjo tashmë marrëdhëniet tuaja me PS-në?

PS historikisht ka gabuar në ndërtimin e aleancave. Dhe e dyta, gabimin më të rëndë historik gabon në taktikat zgjedhore dhe i faturon vetes, i bën varrin vetes, sepse deformimet në sistem i ka përshëndetur, ka qenë ndonjëherë dhe protagoniste duke i quajtur dhe si arritje të sajat. PS patjetër në këtë pikë ka një përgjegjësi të dyfishtë, sepse i takon të mbrojë një model korrekt zgjedhor. Dhe këta mbrojnë këtë model që është në dëm të demokracisë, por edhe në dëm të vetë opozitës, sepse nga hileja fiton më shumë hileqari. Na kanë lodhur shumë parazitë të partive të mëdha, të cilat merrem me “parazitizmin” e partive të vogla. Nuk e kuptoj që sesi mund të akuzosh ti partitë e tjera se duan të jetojnë në kurriz të të mëdhenjve, kur kërkojnë një sistem që kërkon që mandati të dalë në votën tënde. Këtu ka një paradoks. Ne kërkojmë që mandatet të jenë në raport me votën, ndërsa ai mban me zor një sistem që votat tona të shkojnë në favor të tyre. 3 mandate ka fituar PS-ja nga votat e PSD-së. Dhe përsëri lodhen ca nga kërkesat e të vegjëlve.

Jemi futur në vitin elektoral të zgjedhjeve të ardhshme parlamentare. Ka opozita një strategji për të fituar zgjedhjet e 2013?

Opozita fiton, sepse nuk humbet dot. Sepse ndjenja opozitare, revolta opozitare është maksimale dhe me këtë qeveri është një pjesë e saj, vetë votuesit e saj. Të cilëve u ka vajtur në palcë thika ekonomike. Pra është qeveria më e dështuar e të gjitha kohërave, më e inkriminuara dhe në kontrast vazhdon me superlativa të kohës së monizmit për suksese, për arritje, ia kalojmë Gjermanisë. Pra, ne jemi vendi që pasi ia kalojmë Kinës, na e kalon Maqedonia, pasi ia kalojmë Gjermanisë na e fut Mali i Zi. Absolutisht në këtë parodi Shqipëria gjithnjë e më shumë zhytet në Afrikë. Afrika e Veriut na e kaloi dhe duhet t’i kërkojmë falje Tunizisë që e krahasuam Shqipërinë me të para ca kohëve. Dhe sigurisht që nuk krahasohemi dot më dhe as si popull në protestë që di të kërkojë të drejtat e veta dhe as si demokraci. Ja të jap një tregues që atje bëhet gjyq për ata që vranë protestuesit dhe këtu janë në gjyq protestuesit që u vranë. Dhe këtu opozita kërkon falje që ngriti zërin, këtu opozita duhet të jetë e kujdesshme, nuk duhet të provokojë, sepse qeveria të vret, ka punë qeveria. Po e bezdise të vret.

Çfarë nuk shkon tek opozita?

Asgjë nuk shkon. Këtu në Shqipëri nuk shkon asgjë. Në këto situata nuk duhet të diskutohej fitorja.

A duhet të mbajë dikush përgjegjësi për mos kthimin e kësaj fryme opozitare në fitore të zgjedhjeve?

Liderishipi i opozitës ka problem që ka frikë të flasë për zgjedhje të parakohshme, ka frikë të flasë për ndryshim qeveritar, ka frikë të thotë se nuk luftohet korrupsioni me të korruptuar, nuk garantohen zgjedhjet e lira me hajdutë të votës.

Në vitin 2009 keni bërë një parashikim shumë të saktë lidhur me mandatet që do merrte secila forcë politike. Tani, kur jemi një vit para zgjedhjeve, çfarë parashikimi keni për 2013?

Sot nuk bëj parashikime, sepse jemi në një rikonfigurim të politikës, sepse duhet të kalojë njëherë kjo vala që quhet gjoja reforma dhe të konturohen dhe ca parti që jo krijohen, jo nuk krijohen, për të kuptuar më mirë pastaj se ku do rrahin votat. Kështu që jo për t’iu shmangur, por për shkak të zhvillimeve është pak herët për të bërë një parashikim. Atëherë ishin më të qarta gjërat. Meqë më pyete më lart për strategjinë, dua të them se një nga strategjitë që nuk duhet të bëjë opozita është teza e hedhur e fitores me LSI-në. Është teza më absurde që komprometon gjithë veprimin opozitar, që krijon një imazh shumë të gabuar, sepse kjo është dhe një farë fataliteti, sepse thuhet që s’mund të heqim një qeveri të korruptuar pa një parti të korruptuar në krah. Pra, mund të përkufizohej që korrupsioni del me korrupsion. Kjo do të thotë që opozita të lëpijë gjithë betejën e saj trevjeçare dhe mbi të gjitha duhet kuptuar që e majta nuk ka nevojë për votën e kurrkujt përveçse për një konturim të qartë se kush është për largimin e kësaj qeverie dhe kush jo.

Përfshi këtu dhe dy formacionet e reja politike që janë krijuar së fundmi?

Grupimi ka nivele të ndryshme. Të majtët grupohen dhe krijojnë një pol të përbashkët, kanë taktikë dhe program të përbashkët, por kjo nuk pengon për të patur dhe një grupim tjetër që të ketë të njëjtën qëllim.

Por mund të jenë në një koalicion?

Paraelektoral, jo. Sepse janë me programe të ndryshme, kanë dallime, ata janë një fraksion i PD-së dhe kërkojnë elektoratin e djathtë.

E ke fjalën dhe për AK-në?

AK është pak më ndryshe se FRD. Ndërsa partitë tona që kanë qenë në opozitë gjithë këtë kohë dhe për hir të një përkatësie më të afërt programore duhet të kenë grupimin e vet. Dhe kjo duhet të jetë shumë e konsoliduar. Dhe këtu futja e gjembit LSI komprometon. Komprometon dhe vetë filozofinë, programin, dallimin esencial që ne kemi nga pala tjetër dhe është futja e një kolone të pestë, madje me paradhënie. Edhe sikur LSI të shkëputej nga qeveria dhe të vinte nesër me ty, kush na garanton që nuk ikën prapë andej. Përkundrazi, ajo tashmë është mësuar që kalon njëherë majtas, njëherë djathtas. Nuk duhet të harrojmë që LSI-në po e shtyn për të hyrë majtas në zgjedhje PD-ja. Logjika është shumë e thjeshtë, sepse PD plus LSI brenda merr njësoj si grupimi i djathtë pa LSI-në. Pra, nuk i shton vota dhe këtë e treguan zgjedhjet lokale. E dyta, LSI i heq mandate PD-së dhe e nxjerr PS-në forcë të parë. E treta, LSI i dëmton aleatët  PD-së. Atëherë ai i thotë: Ilir, ti kështu e ke zakonin, ti paratë i bëre, partinë e rimëkëmbe nga ana financiare, ne jemi lidhur bashkë, prandaj kalo në të majtë. Po të kalojë LSI në të majtë, PS s’del më parti e parë, sepse i heq LSI mandate. Tani i gjithë problemi është se kur do fillojë ky të sillet prapë si i majtë. Një vit para iu duk gjatë atij, ndaj do e lërë për muajt e fundit. Dhe nëqoftë se PS i var shpresat te LSI, kjo do të thotë që të varesh te i mbyturi, ta varësh moralin tënd te imoraliteti dhe ta lesh fitoren në mëshirën e fatit.

Kohët e fundit është vënë re se PSD, PDS dhe PSV91 kanë bashkëpunuar veçmas PS-së. Përjashtohet mundësia për të dalë të vetme në zgjedhje?

Ne një grupim do e krijojmë, sepse është krijuar vetvetiu.

Pa PS-në?

Po, pa PS-në. Kjo sepse PSD ka dallime të qarta nga lidershipi i PS-së. Ne dallojmë në opozicionin, ku theksoj se lëshimet e njëpasnjëshme janë të pajustifikuara. Bërja palë është alibi për qeverinë dhe firmosja e pseudomarrëveshjeve është komprometuese. E dyta është se ne nuk jemi për pazare, koalicione pazaresh. Hapja e derës, ose pazaret e fshehta me LSI-në nuk janë baza e fitores së të majtës.

Do të thotë kjo që, nëse LSI do të jetë pjesë e koalicionit të së majtës, ju nuk jeni pjesë e tij?

Absolutisht jo. Sepse dallojmë këtu, sepse nga LSI të ndan 21 Janari, të ndan korrupsioni, të ndajnë 7 vjet opozicion i pamerituar, shitje mandatesh. LSI-ja ka qenë mbrojtja numër 1 e gjëmave më të mëdha të kësaj qeverie. Pra, ajo edhe po të largohej nga qeveria do i duhej një kohë karantine, të cilën e bën me votuesit e vet dhe me opinionin publik, sesa do e pranonin këtë akt, në është një reflektim apo një taktikë e radhës. Pastaj mund të shtrohej pyetja a ka vend për rirregullim marrëdhëniesh. Por në kushtet kur ajo është mbrojtja numër 1 e korrupsionit, madje dhe prodhuese e tij, atëherë ky nuk është koalicion, por matrapazllëk. Kjo na ndan.

Grupi i këtyre tri forcave mund të dalë dhe vetëm në zgjedhjet e 2013?

Taktika zgjedhore pastaj do vihet në funksion të interesave. Ne nuk hyjmë te forcat që e bëjnë politikën për inat të sime vjehrre, por kur gabon vetë vjehrra…

A janë zgjedhjet e 2013 basti i fundit për Edi Ramën?

Zgjedhjet e 2013 janë basti i fundit për Shqipërinë. Vetëm një popull si i yni mund ta durojë një situatë të tillë më tej. Këtu nuk e shoh se çfarë fati do ketë vetë Edi Rama, sepse ajo është punë e PS-së. Por e majta historikisht ka humbur, sepse ka luftuar njëri-tjetrin, se s’ka ngritur taktika të sinqerta. Nuk krijon koalicione të sinqerta dhe kanë shitur, ku shitësi kryesorë është LSI. Fatkeqësisht ende PS është larg reflektimit serioz për t’i prevonuar.

Si i shikoni lëvizjet e Fatos Nanos në këtë periudhë?

Një lëvizje nuk mund të vlerësohet në fillim. Ishte një lëvizje presidenciale, ktheu në një lëvizje të llojit tjetër, nga një lëvizje për të ngulitur këtë qeveri, sepse si zgjedhja e presidentit më 2007 dhe më 2012 i kanë shërbyer konsolidimit të kësaj qeverie. Këto kanë qenë raste për të ndryshuar qeverinë. Është bërë e kundërta, janë ndryshuar presidentët që kanë qenë në rregull dhe janë mbajtur qeveritë. Ndaj dhe ne asnjëherë nuk kemi përkrahur idenë për të zgjidhur krizën presidenciale. Kështu që edhe Nano deri dje ishte në tjetër hulli, kishte ambicien e tij, etj., por dihet që Saliu këto i shfrytëzon për interesat e veta. Atëherë e shfrytëzoi për të krijuar 84 votat dhe këtë herë për të thënë që ka garë, ka proces, ka negociata dhe në fund dominuan metodat e Sigurimit të Shtetit.

Po sot?

Sot çdo veprim që synon realisht atë çka duhet të ndryshojë PS si aleatja kryesore, pra në raport me aleatët, me taktikat zgjedhore dhe një opozitë që di të mbrojë interesat e saj dhe të zgjedhësve të saj, të një opozitë që s’ka kompleksin për të krijuar alibinë ndaj kësaj qeverie.

I keni pasur të dy aleatë dhe keni bashkëpunuar me të dy. Kush është aleat më i mirë, Nano apo Rama?

Unë shikoj gjërat e mëdha. Kjo sepse me Nanon dhe kemi bashkëqeverisur dhe aleanca e parë është bërë më ‘97. Atëherë PS ishte shumë në nevojë, sepse kishte rënë shteti, dhe PS me PSD ngritën një bashkëpunim të sinqertë. Është e vetmja fushatë e përbashkët. Pas asaj, Nano ka qenë ca kohë në favor të bashkimit. Pastaj më 2000, Nano ndryshoi. Ndryshoi për shkak të rezultatit apo për shkak të konjukturave të brendshme, këtë s’di ta them. Pas kësaj, PS është sjellë po njëlloj, me një bezdi ndaj aleatëve, llogari si t’ia fusë aleatëve dhe ka dominuar taktika që më shumë bëhen llogari sesi ndajmë pushtetin, sesa si e marrim. Kjo në esencë është një dëshirë për të kontrolluar qeverinë e vetme. Në këtë taktikë, s’kam parë diferencë. Madje, nuk është më sekret që në një nga debatet para 2009-s kam shprehur faktin që s’ka ndryshuar asgjë nga 2001-shi, përveç fytyrës së kryetarit.

 

 

Për të komentuar rregjistrohuni këtu ose logoni me e-mail e Facebook. Për më shumë informacion lexoni

5 Responses to "Gjinushi: Nano dhe Rama janë njësoj, nuk futemi në një koalicion PS- LSI"

  1. Niko  15/07/2012 at 10:51 am

    Nuk kuptoj nje gje nga ju gazetaret! Perse humbisni kohen me “politikan” te tille si kjo fytyre komuniste qe i sillet neper kembe politikes Shqiptare prej 25 vitesh, dhe qe nuk eshte asnjehere dakort me asgje qe arrihet ne kete vend, vetem me anarshine, me dhunen, me anti-europianizmin, etj etj!!! Cfar ka sjelle ky ne politiken Shqiptare pervec se ironi, pazare te ndyra, thirrje per dhune, thirrje anti-reformave europiane, etj etj. Na e largoni kete fytyre nga ekranet dhe gazetat, se ky nuk di te beje asgje tjeter pervec se te ngjalle urrejtje!!!

    • Analisti  15/07/2012 at 5:58 pm

      Nuk i heq asnje presje komentit te Nikos – vetem dua te shtoj se jeni ju gazetaret qe i mbani akoma gjalle keta parazite vegjetues duke i rritur vlerat me intervistat e juaja a thua se opinioni i tyre eshte kaq i cmuar. Nje gje eshte shume e rendesishme per nje gazetar kur interviston nje personalitet ( gje te cilen ky nuk eshte) se sa kreadibilitet dhe influence ka opinioni i ketij personi ne shoqerine civile dhe politiken. Nese nuk keni si te mbushni emisionin atehere zevendesojeni me nje dicak me reale dhe sociale qe ti sherbeje kommunitetit. I tille duhet te jete edhe roli juaj si gazetare ti sherbeje komunitetit dhe jo te bjere ne lojen e thashethemeve te ndyra te politikes, vecanerish per ata qe shquhen te jene kunder ketij populli, qe nxisin vetem urrejtje. Sepse ne nje fare menyre jeni ju gazetare qe nepermjet emisioneve apo lajmeve apo intervistave beheni nje instrument me dashje apo padashje te influenconi ne opinionin publik me perhapjen e idelogjise perverse te ketyre shushunjave (si gjinushi). Po te shikosh me vemendje ne asnje fjale te ketij anarshisti nuk shikon asnje gje positive. Jo me kot lind pyetja: A j vlen te intervistohen keta njerez kur shuhen me tendenca ekstreme negative?

  2. Ibrahim  15/07/2012 at 2:20 pm

    Kjo relik e enverit duhet ta mbyll gojen,bile gjionushit duhet qepur goja.per mua si kosovare pas ruqit gjinushi esht e zeza numer dy e shqiperise.

  3. Kastraveci Alpin  15/07/2012 at 10:49 pm

    Nese ka nje merite PS qofte dhe ajo e ylberisteve te Rames eshte kodi zjedhor i 2008 qe ua vershtiresoi ekzistencen politike lugateve te tille te komunizmit si hienave te tilla si shqipfolesi Gjinushi.

  4. ermal  16/07/2012 at 7:59 am

    Nuk thuhet kot se cdo e keqe e ka nje te mire.
    Dihet se ky zoteria eshte personazhi me i kompromentuar ne politiken shqiptare ne te gjitha negacionet, Göbelsi shqiptar, ish minister i propogandes ne diktaturen komuniste, me agresivi nga te gjithe, mohuesi i gjithshkaje vec vetes, nder me te korruptuarit, njeri i mbushur vetem me urrejtje e qe komenton cdo gje vetem nga pozicioni i politikanit te deshtuar.
    Kjo eshte e keqja e dukeshme.
    Ku eshte “e mira” ?
    E mira eshte se shqiptaret duke pasur edhe sot te tille politikane socialiste, ju freskohet kujtesa e stanit te qenve (jo te lepujve) te kohes se diktatures, kur te gjithe kreret e nomenklatures komuniste, gjate gjithe “historise se lavdishme te PPSH”, vec masakrimit qe i bene popullit, i hengren kokat edhe njeri tjetrit.
    Duke degjuar kete njeri qe vec vjell urrejtje, vetvetiu te vjen per te thene:
    Kokat hengershi ishalla !

You must be logged in to post a comment Login